ອາຫານໝົດອາຍຸແລ້ວ ກິນໄດ້ຫຼືບໍ່?

ເຄີຍບໍທີ່ຊື້ອາຫານຫຼາຍຢ່າງມາຕຸນເກັບໄວ້ຈົນກິນບໍ່ໝົດ ແລ້ວຮອດຕອນຊິກິນຄັກໆພັດຮູ້ວ່າ ອາຫານເຫຼົ່ານັ້ນໝົດອາຍຸໄປແລ້ວ. ຄຳຖາມຕໍ່ມາຄື ແລ້ວມັນຈະຍັງກິນໄດ້ຫຼືບໍ່?

 ກ່ອນອື່ນເຮົາຕ້ອງມາທຳຄວາມເຂົ້າໃຈກັບ ສະຫຼາກຜະລິດຕະພັນທີ່ບອກວັນໝົດອາຍຸສາກ່ອນ ໃນສະຫຼາກຈະມີ ຕົວໜັງສື ບອກວັນໝົດອາຍຸຢູ່2ແບບ
  ແບບທຳອິດແມ່ນ EXP/EXD (Expiry Date/Expiration Date) ໝາຍເຖິງ ວັນໝົດອາຍຸ ໝາຍຄວາມວ່າ ວັນທີຫຼັງຈາກວັນນີ້ ຜະລິດຕະພັນອາຫານນັ້ນ ໝົດຄຸນນະພາບໄປແລ້ວ ຫ້າມກິນຫຼືບໍລິໂພກ ເພາະອາດກໍ່ໃຫ້ເກີດຜົນເສຍຕໍ່ສຸຂະພາບ ຄວນຖິ້ມໄປໄດ້ເລີຍ. EXP/EXD ມັກຈະພົບເຫັນຕາມກ່ອງນົມ, ປາປ໊ອງ, ກ່ອງນ້ຳໝາກໄມ້...

  ແລະແບບທີສອງ BB/BBE (Best Before/ Best Before End) ໝາຍເຖິງ ຄວນບໍລິໂພກກ່ອນ ໝາຍຄວາມວ່າ ອາຫານຈະມີລັກສະນະດີ ຫຼື ລົດຊາດດີເຖິງວັນທີ່ກຳນົດໄວ້ ແຕ່ຫຼັງຈາກວັນທີ່ກຳນົດໄວ້ ລົດຊາດຫຼືຄຸນຄ່າທາງອາຫານອາດຈະລົດລົງຫຼືປ່ຽນແປງໄປ ແຕ່ຍັງສາມາດກິນໄດ້ໂດຍບໍ່ກໍ່ໃຫ້ເກີດອັນຕະລາຍ. BB/BBE ມັກຈະພົບເຫັນໃນ ຫໍ່ໝີ່, ປ໊ອງວາຍ, ເຄື່ອງດື່ມຊູກຳລັງ,...

 ດັ່ງນັ້ນແລ້ວກ່ອນຈະກິນອາຫານທຸກຊະນິດ ຄວນກວດກາຄຸນນະພາບ ວ່າມີສີຫຼືກິ່ນປ່ຽນແປງໄປຈາກເດີມຫຼືບໍ່ ເພື່ອຄວາມປອດໄພຂອງຕົວເຮົາເອງ.

ຂໍ້ມູນອ້າງອີງຈາກ ລາຍການ DidYouKnow